中環出更：義工甩底率急升 肥尹呻科技累事
近年手機應用程式（App）盛行，唔少立法會議員都會透過通訊App開設群組聯絡，去同盟友或傳媒互通消息。但議員尹兆堅（肥尹）就覺得呢類App其實係「雙面刃」，話用App雖然方便咗搵義工，但係義工亦慣咗喺群組內「講咗當做咗」，唔少人喺活動當日「甩底」，佢話寧願用番傳統嘅「面對面」方式，感覺會實在啲喎。
「喺電話交代完就消失」
肥尹話依家用通訊App召集義工，開個群組隨時就有二、三十人加入，睇似好有效率，但有一次到活動當日，最後竟然得唔夠十人現身。佢大吐苦水話義工傾向喺群組內交代同討論活動內容，「有啲人講咗啲意見就當參與咗，當日唔到就短訊交代，少啲罪咎感嘛」；唔止義工，就連苦主原來都有同樣問題，喺電話以文字交代完件事，十個就有八個消失，搞到佢都唔知點跟進落去。
咁點算好？佢話自己觀念比較傳統，覺得同義工見面係必要，「見面時對方可以感受到你嘅熱誠」，又話苦主見唔到真人，係無可能信得過議員，所以佢話寧願用番一貫做番，坐低「面對面」商談。其實科技發展同政治息息相關，好似近年嘅選舉，網上平台就成為兵家必爭嘅新戰場，肥尹不如學吓點樣運用新科技仲好啦！
卓妮