中環出更：同窗爆料 曾浩輝打麻雀好水皮
港大醫學院培育出唔少出色嘅醫護界人士，港大醫學院早前為慶祝成立一百三十周年而舉辦晚宴，筵開超過三百席，有三千多位校友及政商界人士到賀，個個講起同港大嘅緣分，講嚟講去講唔完。當中令人眼前一亮嘅，係退休後少咗出席公開場合嘅衞生防護中心前總監曾浩輝，佢匆匆忙忙咁派入場券畀同學，又畀路過嘅同學大爆佢讀書時輸麻雀。
曾浩輝聽到同學形容佢打麻雀「好差」，即刻笑到停唔到，問佢係咪成日打，佢就話「娛樂吓都有嘅，細細個開始都打o架啦」。佢話今次最開心係遇番好多失散嘅同學，笑指自己係「out晒嘅老人家」，依家返大學客串教書都有少少感觸，啲學生會同佢講「當年讀小學喺電視度見到你o架」，令佢覺得自己好老，有少少後悔以前喺電視出現過，仲會反問學生「我依家都同以前冇乜分別o架呵」。
食物及衞生局局長陳肇始同該局政治助理鄭守崗同樣係港大校友，二人仲係師徒添！陳肇始相當照顧呢位學生，不斷介紹著名嘅醫護界人士畀鄭守崗認識，仲孖住佢同港大微生物學系講座教授袁國勇一齊合照。陳肇始又講起鄭守崗讀書時期已留意到佢，因為佢當年做班長，係好主動同有責任心嘅學生。
梁憲孫難忘沙士唔敢出街食飯
一百三十周年活動指導委員會主席梁憲孫係港大醫學院前院長，佢話最難忘係沙士時，身為高危人士唔敢出街食飯，原本拒絕啲Auntie探佢，點知對方話「我一把年紀，都冇咩所謂啦」。梁憲孫本身係治療血癌嘅專家，佢話血癌病人原本就好易發燒，當年「杯弓蛇影」，好擔心病人係咪患上沙士，都檢查得特別緊張，點知真係有病人患上沙士，好擔心令其他病人受感染，好彩該名病人最終冇事，真係難忘嘅回憶。
卓妮