有首歌係咁唱嘅︰「白天和黑夜只交替沒交換，無法想像對方的世界。」財政司司長陳茂波尋日發表網誌，話家陣樓價租金高企，加重市民嘅生活負擔，窒礙各行各業發展以至青年人創業，令佢寢食難安咁話。堅離地成咁，點止「白天不懂夜的黑」，直頭「飽漢不知餓漢飢」！
唔係咩，波叔住大大間官邸，仲要未入住，先興奮，大拿拿花二百萬元公帑豪裝一番，食得招積，住得舒適，何來「寢食難安」！再講吖，係人都知陳司長有個花朵「劏房波」，又有另一個花朵「囤地波」，樓價租金高企，有人開心都嚟唔切。咁就難怪佢老哥要匿埋屋企寫網誌，如果對住鏡頭講，容乜易唔覺意唧一聲笑出嚟o架。
講真，租金樓價長升長有，高處未算高，年輕人莫講話創業，連搵個竇口獨立生活都成問題，好多後生仔連租都捱唔起，被迫與父母同住做啃老族，就係咁解。今時今日年輕人上到車，如果唔係靠「父幹」，基本上可以作為「生命勇士」一類嘅勵志故事登報紙。愈來愈多年輕人明知置業無望，惟有退而求其次輪候公屋，一到十八歲生日即刻入紙申請。以前屋邨仔畀人睇唔起，依家有間公屋在手，卻被視為實現財務自由嘅「身份象徵」，問你服未。
所以話，話市民住屋困難，同阿媽係女人冇乜分別，牛頭角順嫂都知，絕對唔使每個月幾十萬請條友返嚟講，大家最想知道嘅係，官老爺有乜符弗解決問題。唔講猶自可，一講把幾火。運房局日前公布《長遠房屋策略》周年進度報告，估算政府覓得嘅土地，淨係夠起廿三萬七千個單位，距離達標仲有四萬三千多個。被問到覓地建屋有何良方，光頭局長形容「決心大過信心」，大家知咩料喇。
數字最能說明問題。過去一年居住環境欠佳嘅劏房住戶急增一萬，去到超過十一萬戶，有租戶大嘆面對業主瘋狂加租，唔知有冇命等到上樓。古人所講嘅「貧無立錐之地」，咪就係呢挺囉！
好心波叔啦，與其嘥時間做鍵盤戰士，不如攝高床板諗吓點樣砌好份財政預算案，切實惠民好過。不過嘥氣啦，盛傳預算案有「三不搞」，其中包括唔會重推代繳公屋租金。政府庫房水浸，財政儲備足夠應付三年幾開支，連派粒糖甜吓嘴搞小恩小惠都唔肯，仲有冇再離譜啲呀。高官與民為敵，睇嚟今年鵝頸橋阿婆將會有排忙。
諗落都幾無奈，走咗個守財奴鬍鬚曾，嚟一個鐵公雞劏房波，七百萬市民生活苦過弟弟，真係唔慌唔「寢食難安」嘞！