遊行示威在香港已成為常態，而每次遊行，亦是各反對派藉此巧立名目籌款之時，之不過市民已看清楚反對派的真面目，無論祭出甚麼「與抗爭者同行」、「反威權統治」、「聲援政治犯」，人數愈來愈少，究其因，除了市民見到沿街募捐人手幾乎多過主辦單位骨幹，亦看清遊行的主題根本就係名不正、「行不順」！
阿哥，乜嘢「反威權統治」啊？正如有人話齋，香港警隊亮出警棍都要寫十頁八頁報告，眼見同袍被暴徒往死裏打，都係向天開一槍示警，睇怕即使強調「民權」嘅美國，啲警察都未必咁克制。大家回想旺角暴亂時警察的忍讓，有乜可能香港係「威權統治」？再講啊，威權政府要處置政治犯，首先要限制其人身自由、言論和集會自由；而香港的所謂「政治犯」，他們「反威權」遊行倒得到不少厚待：封咗大半條行車大道、巴士改道、沿途有警察開路並維持秩序，畀你班保釋期間的「政治犯」大搖大擺狂呼口號。阿哥，世上有這麼溫柔敦厚的「威權政府」嗎？
反對派號召市民元旦遊行，說是要「守護香港」，主題係反對「閹割議會、政治打壓、割地兩檢」，明眼人一睇就知又係靠嚇！反對派為了阻止立法會修改《議事規則》，除了人身攻擊，還屈人性騷擾、一再出動防狼器，市民在外面都睇到窒息，仲守護乜鬼香港喎？民陣都有自知之明，知道點聲嘶力竭呼籲，遊行人數都唔會多，是以向警方申請遊行人數二千人，屆時反對派政黨記得叫埋姨媽姑姐嚟支持吓，否則遊行示威變示弱，咁就真係唔衰攞嚟衰！
真係要守護香港，反對派少啲廢噏就係幫忙喇。香港今日社會不安，就係多得啲鼓吹「違法達義」、「坐監令人生更精彩」嘅政棍，要言之，就係別人子女留案底，自家子女學業成績要好好睇。醒醒喇，年輕人！