政情：區諾軒扶乳鴿上位 圍堵陳家珮

唔敢插手海怡 怕累街坊

區諾軒扶持嘅兩隻新乳鴿，包括佢嘅助理嚴駿豪及網名「山卡啦」嘅利東街坊陳炳洋。嚴駿豪喺俗稱西邨嘅鴨脷洲邨做社區主任，陳炳洋就喺鴨脷洲北部嘅鴨脷洲大街落腳。選區上嚟睇，呢兩個區喺正鴨脷洲嘅右邊，而羅健熙同區諾軒嘅選區係唇齒相依嘅利東邨（一）同（二），位置上剛好佔據鴨脷洲左邊。左右四個選區加埋，已經封咗鴨脷洲連接黃竹坑同香港仔嘅出口，版圖上可謂變成白鴿根據地。

不過理想歸理想，區諾軒承認地區勢力複雜，而且按立法會選舉嚟睇，呢兩區建制比泛民多票，要佔一席位有一定難度。

至於鴨脷洲最深處嘅海怡半島，分為東西兩區，西由陳家珮主理，東則為香港島各界聯合會嘅林啟暉。區諾軒話，海怡入面有香港眾志同公民黨（公民袋），而且睇番上屆選舉結果，泛民喺海怡東失利唔係輸票數，而係欠協調，所以佢哋唔會插手入去搞搞震。當年公民袋陳家洛有一千八百多票，海怡關注組主席區元發就有六百多票，兩人加埋比起連任成功嘅林啟暉多出成二百票。咁睇落，呢班乳鴿真係唔插手搞亂檔好過，否則就累街坊喇。

四面楚歌 陳家珮：未驚過

睇番成個南區區議會，十七議席建制派就佔十二席，泛民只得五席，形勢上建制派優勝。鴨脷洲大街上屆有街坊福利會代表參戰得票超過七百，現任區議員張錫容以千五票大比數拋離，陳炳洋雖然係網上略有名氣，但要喺街坊手上取得支持亦非易事。至於嚴駿豪挑戰西邨一席就可能有些微希望，事關現任區議員林玉珍自一九九九年當選後就再無對手，冧莊五屆，用小鮮肉迎戰可能會有新衝擊。陳家珮接受查詢時就指，唔擔心被包圍，對兩名現任區議員好有信心！睇嚟呢幾隻乳鴿計劃可唔可以得逞，就要拭目以待喇！