中環出更：鄧家彪「野生捕獲」陳帆夫婦
適逢聖誕期間，唔少市民開始放假，工聯會離島區區議員鄧家彪（Bill）同工聯會榮譽會長陳婉嫻，前日就把握機會喺大埔擺街站，估唔到成功「野生捕獲」運輸及房屋局局長陳帆。雖然陳帆同太太拍緊拖，但Bill仍然唔錯過機會，即刻同陳帆反映大埔富亨邨同隔籬即將發展嘅第九區地皮嘅交通問題。
Bill話，大埔好多區都有K巴來往鐵路站同各個社區，但偏偏富亨邨咁多年嚟都冇K巴接駁，特別係逢星期一至五K巴可以免費接駁鐵路，所以冇K巴對該邨居民嚟講除咗不便，經濟上都有一定影響。佢又話，唯獨富亨邨冇K巴亦有欠公平，質疑政府忽視該邨邨民需要。
話陳帆似「靈魂游走」咁
Bill補充，富亨邨冇K巴嘅問題已積存多年，加上同富亨邨相鄰嘅第九區將推出七千個單位，如果未能盡快安排K巴，情況會愈嚟愈嚴重，所以既然難得撞到陳帆，一定要同佢好好反映有關情況。
不過唔知係咪因為太突然，Bill話陳帆好似「靈魂游走」咁，雖然話會了解同跟進，但其實都唔知佢係咪聽入耳，可能都要事後睇吓陳帆有冇行動先知喇！
卓妮