中環出更：楊偉誠拖實張德蘭溫馨掃貨
又到聖誕，又到聖誕！唔少政商界名人都會趁聖誕假期買禮物氹吓摯愛，或者去吓旅行。卓妮早前就見到今年獲委任為西九董事局成員嘅演藝學院校董會副主席楊偉誠（Frankie），同佢太太、資深歌手張德蘭好悠閒咁喺中環歷山大廈地下嘅名牌時裝店買嘢。唔知係咪西九啲嘢搞得七七八八，最近唔使拆彈，所以咁有閒情逸致出嚟行街呢？
當日大約下晝三點半，Frankie夫婦十指緊扣咁行入時裝店，張德蘭不時依偎喺老公身旁，表現得小鳥依人，真係羨煞旁人！當Frankie試衫嘅時候，張德蘭就喺外面靜靜等候，兩人喺舖頭逗留咗大約二十分鐘離去時，見Frankie拎住一大袋戰利品，睇嚟收穫唔錯。
夫婦將去南韓旅行
之後兩人又去到太子大廈揀魚子醬，細心研究大約十分鐘，終於揀到心水魚子醬，畀錢後就離開。行到門口，張德蘭又喺櫥窗度張望，老公即刻上前搭實老婆膊頭，畫面甚為溫馨。
Frankie今年新任西九董事局成員，理應工作好忙，點解咁有興致出嚟行街？Frankie就話，因為當日休息，而且手頭上嘅工作都搞掂晒，可以暫時放低吓，所以就跟太太出嚟拍吓拖喇！Frankie仲話兩人跟住會去南韓旅行，主要行吓街同食嘢，仲話每年年底做晒嘢都會同老婆去玩。寒暄一輪後，佢就拖實老婆離開，繼續拍拖過二人世界。
卓妮