內地騙案頻生，「錢多人傻速來」呢句順口溜火速成為潮語，其實「錢多人傻」點止內地呀，好似學生資助處吖，每年有唔少資助個案屬於瞞報漏報資產，大專生扮窮呃錢固然衰到貼地，但政府錢多人傻亦難辭其咎。
嗱，為咗幫助清貧子弟完成學業，港府推出兩個資助計劃，包括供八大院校學生申請嘅「資助專上課程學生資助計劃」，同埋畀自資院校學生申請嘅「專上學生資助計劃」，除咗可獲低息貸款，資助部分仲唔使償還添，真係唔錯o架。可惜吖，正因為當局把關不力，是是但但，結果被人鑽空子，唔係瞞報就係漏報資產，計劃變質變味，淪為予取予求嘅提款機。
有數字為證o架。學資處上學年嘅調查報告顯示，被抽查進行家訪嘅二千二百多宗個案之中，有一百八十宗出現漏報或瞞報，比率達百分之八，即係每十二個家訪就有一個斷正。咁仲唔止，當中廿二宗屬嚴重個案，須全數退還資助，較前年嘅十三宗勁升七成，反映呃資助情況不斷惡化，唔到你唔驚。
睇到喇，部分大專生唔止鍾意搞港獨，仲鍾意呃資助，做人毫無誠信，將來社會交到佢哋手上會變成點，真係不敢想像。鬼咩，校園師不師，生不生，再離譜嘅事都有可能發生。不過話分兩頭，如果學資處審批唔係咁求其，也也烏，學生想博大霧都唔容易。原來學資處每年只會對百分之五嘅成功申請個案進行家訪，換言之九成半個案唔會抽查，被揭發風險咁低，唔怪得愈來愈多學生鋌而走險咯。
教育界人士就講得啱嘞，學資處必須加強抽查，堵塞漏洞，最重要係加強罰則，嚴重者應該送官究治。之但係港產官僚出名四方木，踢都唔識郁，恐怕講咩都係嘥氣。講到底，學資處嘅資助來自公帑，官僚唔使自掏腰包，點樣浪費都唔肉痛，當然乜都懶懶閒，反而加強抽查會增加工作量，多一事梗係不如少一事喇。
冇計喇，香港就係咁荒謬，一方面庫房水浸，公帑唔係被濫用就係被浪費；一方面貧窮人口有增無減，真正需要幫助嘅人反而得唔到幫助。好似震驚全城嘅殺女案，佢哋正正係社會上最需要幫助嘅低下階層，偏偏官方從來冇伸出援手。到底仲有幾多隱蔽高危個案未被發現，真係冇人講得埋。
話口未完，尋日就有位七旬清潔工人，疑倒垃圾失足跌落大廈垃圾槽底斃命，人哋年紀咁大都努力工作，反而學生哥年輕力壯竟然千方百計呃資助，想唔講句世風日下、道德淪亡都唔得吖。