政情：冇錢買樓 鄭泳舜：用晒養仔
香港打工仔女買樓「上車」難，唔少年輕一輩都要靠父幹先可以圓置業夢，就連深水埗區議員鄭泳舜（Vincent）都話係冇物業，因為啲錢用晒嚟養三個囝囝，所以政府如果推出首次置業印花稅減免措施，對佢嚟講都幫助不大。Vincent爸爸係知名商人，富二代話自己養得仔嚟就冇錢買樓，真係少咗啲說服力囉。
冀提升子女免稅額
聖誕前夕，Vincent就同九龍城區議員關浩洋一齊喺黃埔擺街站大唱聖誕歌，仲設置聖誕願望樹畀市民表達對來年政府財政預算案嘅期望，如首置印花稅減免、增加子女免稅額、長者醫療券等。而Vincent就最希望政府可以提升子女免稅額，幫輕吓啲中產爸爸咁話。
Vincent呻話，作為三子之父，一到聖誕節同新年就好大壓力，因為又要買禮物，又要派利是。佢又話，屋企年年聖誕都會布置聖誕樹兼擺滿禮物，但今年太忙就冇買禮物喇。咁佢啲囝囝咪好失望？佢話尋日早上已經帶咗小朋友去買聖誕禮物，之後趕返屋企玩，唔肯陪佢去唱聖誕歌喎。