政情：西貢區會學立會 限制議助進出
立法會近年屢爆衝擊事件，所以每當審議具爭議項目時都加強保安，包括限制可通行至舉行會議樓層嘅議員助理（議助）數目。最近西貢區議會亦擬倣效立法會，加強保安措施，包括只有持通行證嘅議助先可以進出區議會指定範圍。唔通西貢區議會都發生過議員、議助衝擊會議事件，所以要提升保安級別？
設通行證為堵保安漏洞
西貢區議會下月二日開會討論有關通行證安排。有份提出建議嘅議員張美雄就解釋，區議會未發生過衝擊事件，增設通行證亦與衝擊無關，只係因為區議會大樓三樓會議室同四樓公眾席、秘書處互通，而設於三樓嘅議員儲物櫃並非全部有鎖，存有保安漏洞。
張美雄話近年多咗一啲並非議員及議助嘅閒雜人同地區人士喺大樓自出自入，議員儲物櫃分分鐘唔見咗嘢都唔知。佢又話，唔止試過有身份不明人士趁開會捉住官員遞信、影相，仲試過有人擅自用咗秘書處嘅影印機添，民主派同建制派都覺得咁搞法「唔對路」。講到區議會成個無掩雞籠咁，唔怪得要整頓下喇。