中環出更：蔡素玉裂尾龍骨 搵神醫幾百蚊搞掂
立法會前議員蔡素玉經常去埋啲特別地方考察，今年九月佢就同朋友去咗北極做研究，點知喺船度跌裂尾龍骨，痛咗幾日。返到香港搵咗個神醫，連尾龍骨都冇摸過，淨係整咗手腳嘅位置，一整完就即刻唔痛，去咗三次已經好番晒，每次診金只需三百元。聽落認真神奇，估唔到佢連任港區人大代表「打不死」，連整親都大步檻過。
唔使食藥針灸 徒手醫番好
蔡素玉話，呢位神醫喺渡船街行醫，好出名，診治手法有三不：不用食止痛藥、不用食中藥、不用針灸，神醫徒手用幾分鐘就醫好佢，認真神奇，仲話好多足球員、警察都幫襯過。咁係咪熟人介紹佢睇嘅呢？佢就霸氣回答：「咁佢（神醫）姓蔡嘅，我識得嘛」，認真交遊廣闊。
蔡又提到，平時「拗柴」（扭親腳）起碼兩個月先好番，有次拗柴去搵神醫，大力拍一下，「拍到我嗌救命」，「半秒鐘，搞掂晒」。另一次拗柴，咁啱神醫喺北角打緊麻雀，佢即刻搵上門，神醫好人唔打牌住，幫佢摸一摸、打一下，咁就好番，難怪佢都形容「好犀利，真係嚇死你」！
卓妮