中環出更：聖誕Party玩懷舊 時光倒流60年
最近聖誕派對一浪接一浪，早前卓妮出席一個以五十年代懷舊服飾為主題嘅聖誕晚宴，東華三院副主席馬清揚（Philip）都有到場。見佢喺白色恤衫外面套住件白藍黑冷衫，加上一對白色波鞋，點睇都唔似係五十年代嘅扮相。Philip就笑笑口指住自己個頭，話髮型係學佢爸爸、東華前主席馬錦燦喺嗰個年代嘅模樣，仲即刻喺手機度搵番馬錦燦出席東華活動時嘅舊相，話有相為證喎！
Philip表示，爸爸係一九五○至五一年嘅東華主席，所以有好多黑白舊相。望真啲，兩父子嘅髮型又真係幾相似，都係兩側剷青，然後將頭髮向後梳。之不過呢個潮男髮型依家通街都係，Philip似係跟上潮流多啲，而潮流又咁啱興五十年代復古風啫，真係搞笑。
劉文文話嗰陣未出世唔識扮
當晚係潮州商會青委主辦嘅聖誕派對，潮青主任章曼琪、副主任龔雅璇以及林秀鳳、名譽參事劉文文及參事蔡少洲等人都去同樂。不過，佢哋個個都着得好hea，一啲都冇懷舊感覺。劉文文就笑住「投訴」，自言五十年代佢都未出世，點扮喎！歌喉唔錯嘅蔡少洲就用歌聲「搭夠」，當晚佢大唱懷舊歌曲，確實增添唔少舊時代氣氛。
潮州商會會長胡劍江及潮屬社團總會青委主席張俊勇都有出席。卓妮見張俊勇嘅左胸前戴住一個寫住自己名嘅襟章，離遠就見到大大粒「勇」字，名副其實係「心口掛個勇字」，張俊勇就話自己做人不嬲都咁勇！
卓妮