最近有調查顯示，市民今年聖誕節消費意欲創近年新高。可惜吖，有人歡喜自然有人愁，香港作為全球最富裕社會，貧窮人口愈來愈多，社會問題愈來愈嚴重，呢啲咪表面風光，內裏陰乾囉。
正如聖公會大主教鄺保羅喺聖誕文告所講，根據港府公布嘅最新貧窮數字，貧窮人口創○九年以來新高，其中又以長者貧窮問題最為嚴峻，呼籲市民發揮施予精神，盡力關懷照顧有困難人士，同時政府亦要制訂創新同有前瞻性嘅政策；而天主教香港教區主教楊鳴章嘅聖誕賀詞，就主要關注年輕一代成家立室遭遇嘅困難同挑戰。
冇錯嘞，聖誕節點只去旅行，食大餐同埋交換禮物咁簡單吖，試諗吓，耶穌連醫院都冇得住，要喺馬槽降生，話聖誕節係屬於弱勢群體嘅節日，相信冇人會反對。講到呢度，功夫茶諗起前兩日有位婦人，光天化日下喺旺角街頭大派「聖誕大禮」，一張張「大牛」、「金牛」係咁塞畀途人。睇真啲，原來背後有段辛酸故事。呢位單親媽媽十幾年來含辛茹苦，獨力湊大個女，壓力巨大之下，諗到用「派錢」換取女兒快樂成長。你話嘞，一個人如果唔係絕望到走投無路，又點會行呢一步呢。
同樣係弱勢家庭，相對近日震驚全城嘅劏房婦殺女案，上述畸士已經算係「幸運」。一個新移民單親媽媽，本身有濫藥問題，從事社會上最底層工作，住嘅又係差無可差嘅劏房，咁樣一個高危個案，十幾年來竟然無任何一個政府部門提供支援，發生悲劇只係遲早嘅事。
所以話，宗教領袖呼籲高官關心民間疾苦，同對牛彈琴冇乜分別。大家睇吓林鄭，開口埋口話以做過社署署長為榮，點知最近一次電台訪問即刻現形。佢憶述細個一家七口住灣仔板間房，兄弟姐妹都係婆婆湊大，自己就好生性咁幫手穿膠花、剪布頭，林鄭講呢個感人勵志小故事嘅結論係，社會福利不足可以透過家人互助搭夠，直到依家佢都經常提醒自己，喺制訂社會政策時唔好令人失去「自助精神」。嗱，呢啲就係AO出身港產官僚嘅典型精英心態︰個人成功完全因為自己天賦異稟刻苦耐勞肯拚肯捱（下刪二千字），社會底層人士「失敗」就係好食懶飛不思長進，講得好聽就「授人以魚不如授人以漁」，講得難聽就係怕福利太多「養懶人」，咁嘅心態，唔愈扶愈貧就有鬼。
《聖經》裏面耶穌點樣對待弱勢群體？「我實在告訴你們，這些事你們既作在我這弟兄中最小的身上，就是作在我身上了。」蒙上帝感召嘅特首大人，收到未呀？