中環出更：創科時代來臨會計師行做埋網絡安全

Bella係「中國罐王」、中華廠商聯合會名譽會長羅富昌個女，佢年幾前離開家族公司加入四大會計師行，不過佢就唔係會計師。Bella話，隨住創新科技時代來臨，會計師行已經唔止做傳統稅務及核數業務，仲做埋網絡安全、教育及初創企業諮詢等，佢未入呢間公司之前都唔知添。現時佢就負責創新科技業務，包括喺內地建立創新中心平台。

講座晚宴分享創業心得

同場仲有本身係酒店太子女嘅浙聯青委主席王淑慈（Sukey），佢除咗要幫手打理酒店之外，佢同老公仲喺香港開咗三間日本餐廳，佢嘅創業心得就係凡事親力親為。Sukey亦係中總會董兼青委常委，所以當晚除咗浙江幫之外，仲有好多中總青委好友去趁熱鬧，包括主席黃楚恒及太太黃陳嘉妮等人。黃楚恒接手有八十幾年歷史嘅家族藥業生意，淨係省靚招牌都忙到冇時停，無暇去諗自己創業。佢話現時主要係睇實公司嘅管理及產品質素，多啲去攞香港名牌、Q嘜等認證。

柯琼浩（左）及王俊傑（中）因浙聯締結姻緣，同樣係浙江鄉親嘅丁心怡（右）都戥佢哋開心。

羅頌宜（右）同黃楚恒夫婦（中及左）好啱傾。

上海總會青年組主任委員車弘健、浙聯青委會副主席柯琼浩、秘書長王俊傑同浙江旅港青年會會長丁心怡等人都有到場。柯琼浩及王俊傑相識於浙聯，當晚咁啱就係兩人結婚一周年，一班手足加插慶祝環節，倍添溫馨。

卓妮