最近備受注目嘅國際大事，肯定非美國承認耶路撒冷為以色列首都莫屬，美國駐以大使館仲拿拿臨遷去耶城添，背後釋出嘅訊息好明顯，咪就係美國明撐以色列同埋猶太人囉。
講到咁遠，無非想話畀大家知，官方一舉一動都有政治意義，必須謹言慎行就係咁解。好嘞，咁香港嘅機電工程署署長及發展局官員齊齊現身被釘契嘅燒烤場吃喝玩樂，係咪為違規行為背書，畫公仔唔使畫出腸喇。
係咁嘅，本港兩個機電工會最近聯合舉辦職安活動，邀請機電工程署署長同埋發展局官員出席，本來呢，高官與眾同樂冇乜唔妥，弊在呢個活動選址天水圍一個違規燒烤場舉行，而該處正正位於臭名遠播嘅非法泥頭山範圍內，咁就大有問題嘞。家陣上址係就係改建成燒烤場，早就面目全非，之但係搭建物全部未經申請，擺明違法，一眾高官仲去助興，V晒手咁忘形合照，到底係人蠢冇藥醫定係助紂為虐，你話呢？
正如魯迅話齋，「向來不憚以最壞的惡意來揣測中國人」，今次事件除咗反映高官們冇政治智慧之外，包庇違法亦係好合理嘅推測，事關呢個泥頭山去年被揭發後全城嘩然，仲激起市民對不法人士「先破壞，後發展」嘅不滿，鬧到滿城風雨，可以話係人盡皆知，機電署署長冇理由未聽過，家陣先至話地點由主辦單位決定，署長無權話事，扮無知置身事外，搵人信至奇。最離譜係，地政總署去年處理泥頭山拖拖拉拉已經備受詬病，點知違規問題至今未解決，證明有法必依只係大隻講，簡直不可原諒吖。
嗱，今次呢單醜聞經過傳媒大肆報道後，政府部門終於有反應嘞，屋宇署話現場搭建物未經批准，會向業權人發出清拆命令喎，而元朗地政處亦指業權人冇喺限期前糾正違契情況，已進行釘契程序，呢啲咪叫四方木，唔踢唔郁囉。早知今日，何必當初，如果唔係港產官僚隻眼開隻眼閉，上址又點會由農地變成泥頭山，再由泥頭山變成燒烤場吖，所以話啫，由地政總署到屋宇署等執法部門失職枉法，係吟詩都吟唔甩喇。
話時話，新界土地亂七八糟都唔係今時今日嘅事，莫講話違規燒烤場比比皆是，泥頭山隨處可見，官地被人非法霸佔亦係等閒，就算當時仲係發展局局長嘅林鄭月娥，擺出強硬態度對付丁屋僭建，結果一樣虎頭蛇尾，都仲未數橫洲風暴嗰一筆。睇到喇，港府成日呻地從何來呻到樹葉落，講到尾就係有法不依、欺善怕惡，呢個死症醫唔好，拓土建屋舉步維艱又有乜出奇。