政情：梁煒茵唔做金融 轉行賣煲仔飯
金融業一向係後生仔女工作嘅首選，唔少人都夢想炒炒吓就可以炒出個未來。不過，香港深圳社團總會永遠會長梁滿林嘅女兒、中華出入口商會會董梁煒茵（Iris），早幾年就放棄高薪嘅金融業工作，喺深圳開餐廳專賣煲仔飯，最近仲準備進軍香港添！
雖然Iris年紀輕輕，但在社交界都好活躍，佢做過東華三院總理，仲係華人華僑總會青委副主席，好多商界名人好友知道佢不怕辛苦開餐廳，仲獨沽一味賣煲仔飯，都話嗰份堅持好抵讚。Iris就笑笑口話，煲仔飯通街都有，但係依家個個都擔心食品安全，所以多年前佢哋開始不停收購農場或製作工場，咁就可以確保食品安全之餘，仲可以保留古法工藝。
例如佢哋臘腸嘅豬肉來自散養嘅土黑豬，米來自東北嘅黑土地，就算豉油都係自製嘅。點解食個煲仔飯都咁認真？Iris笑稱，佢係深圳寶安人，當地以臘腸聞名，所以對臘味及煲仔飯嘅感情自然唔同啲喇！