中環出更：林健鋒孖囝囝飲咖啡拉出父子相
近年飲咖啡成為全球大熱，咖啡上嘅拉花更加廣受年輕一代追捧。身兼中華廠商聯合會（廠商會）名譽會董嘅立法會議員林健鋒（Jeffrey）尋日去工展會支持一眾參展商，卓妮見佢同個仔林凱章拎住杯咖啡不停研究，行埋去睇真啲，原來咖啡上面嘅拉花圖案正正係兩人嘅樣。
製作人面拉花嘅唔係一般咖啡師，而係一部新款咖啡機。Jreffrey笑笑口話，拉花見得多，但係有埋自己嗰樣真係第一次見，仲講笑咁話廉政公署嘅咖啡咁出名，應該裝番一部，幫啲嫌疑犯沖咖啡時，順便拍低埋佢哋個樣，工作就更加有效率喇。呢部咖啡機嘅主人、餐飲聯業協會會長黃家和就話，時下年輕人鍾意自拍，相信部咖啡機可以滿足大家嘅自拍欲喇。
劉怡翔買臘腸應節
講開工展會，梗係諗起掃貨，唔少政界人士都掃埋一份。好似財經事務及庫務局局長劉怡翔就買咗幾包臘味，佢話最近天氣轉涼，所以買啲臘腸返屋企煲飯食應吓節。發展局政治助理馮英倫就買咗唔少奶茶，因為佢爸爸每朝早都要飲奶茶先有精神。
廠商會永遠名譽會長施榮懷、中華總商會會董張俊勇及立法會議員容海恩有到場，容海恩話以前年年都會同屋企人一齊入場辦年貨，佢最記得當年有好多平時食唔到嘅特色嘢，所以每次嚟都食餐飽。立法會前議員吳亮星就行咗好耐都無買嘢，佢話平時屋企買嘢都係老婆負責，自爆唔熟悉物價，為免買貴或買錯，寧願唔出手喎。
卓妮