潮流興講環保，民間愈來愈多人身體力行，為保護地球行多一步，反而官老爺講多過做，唔係流於空喊口號，就係政策五時花六時變，令人無所適從，簡直吹脹。
話說環保署同商界合作推出嘅《大型活動減廢指南》尋日正式推行，目的係鼓勵活動主辦單位做好全面廢物管理規劃，由籌劃活動開始源頭減廢並做好乾淨回收，減少堆填區壓力。本來呢啲都係舉手之勞，唔少活動搞手都主動響應，好似大角咀廟會嘅盆菜宴咁，嚟緊大會將增設水機並鼓勵群眾自備水樽，又會停止供應即棄餐具、濕紙巾、樽裝水及汽水等，預計可減少萬多件垃圾，都幾有意義o架！
但令人驚奇嘅係，同樣係政府場地，源頭減廢措施居然「一港兩制」。出年三月喺維園舉辦嘅花卉展，康文署為配合指南，取消派發樽裝水，設立斟水站，又會提醒參與嘅學童自備水樽；至於香港大球場舉行嘅一年一度國際七人欖球賽，主辦方透露曾希望喺場內提供可再用水杯及鼓勵球迷自備水杯，奈何受限於場地規定，任何塑膠或玻璃容器不得攜帶進場，想幫手減廢都冇符。
如果話禁帶水樽入球場係出於保安考慮，點解唔索性禁酒？再講吖，規矩係死人係生嘅，好多嘢應該視乎實際情況靈活變通，家陣市面好多環保杯物料輕，佔用空間細，部分甚至可以摺疊，照計唔會造成安全隱患。話時話，欖球、足球賽事禁止自攜水杯，其他好似籃球、乒乓球以至保齡球、游泳比賽又有冇同樣限制？唔通推廣環保都大細超玩歧視？
一節見則百節知，港產官僚坐喺冷氣辦公室拍拍腦袋，拍拍心口就做決策，根本冇考慮執行過程有乜困難，結果往往搞到人格分裂，講一套做嘅係另一套，甚至以今天的我打倒昨天的我。近年電動車大行其道，官老爺學人趕時髦，話要喺香港推廣埋一份，仲訂立時間表添，可惜眼高手低，政策配套完全跟唔上，充電設施嚴重不足，鬼咁唔方便都算嘞，最離譜係大幅調低電動私家車首次登記稅寬免限額，根本就係葉公好龍。
另一個經典例子係Uber。最開頭當局當正政績咁大事吹噓，又話創新科技又話吸引投資，爭在未好似區議員掛「成功爭取」街板，點知一個屈尾十差人走上門拉人封艇，告將官去，港產官僚朝令夕改，神係佢哋鬼又係佢哋，係投資者都怕怕喇！
為政不在多言，顧力行何如耳。官老爺講就兇狠，做就無能，掂親邊瓣衰邊瓣，成個香港七國咁亂，民望想唔低殘都幾難！