政情：吳克儉退休得閒 繼續搵書睇
教育局前局長吳克儉退休後「無官一身輕」，話自己時間鬆動咗，可以多啲時間約吓朋友、做吓運動，而佢仲話退咗休之後都依然關心社會，尋日仲出席一個企業有關社會責任嘅研討會，喺會上佢提出未來嘅學生要對社會有承擔，希望學生同佢一樣多啲關心社會咁話喎。
喺熱廚房工作期間，吳克儉講過每個月會讀三十本書，唔知退休之後時間多咗，會唔會可以再睇多啲書？
啱興趣係重點 IT創科都睇
佢話書嘅數量唔係重點，重點係揀啱興趣同主題，又話退咗休係多咗時間睇以前唔得閒睇嘅書，例如關於智慧城市、科技發展同教育體系等，估唔到佢唔單止會睇旅遊雜誌，仲連IT、創科都睇埋，真不愧為「睇得最多書」嘅局長喎。