政情：李兆富告誹謗 葉劉強調講真話
新民黨立法會議員葉劉淑儀喺上周三自爆被領展派出身兼《蘋果日報》專欄作家嘅公共政策顧問李兆富，透過該黨政策總裁袁彌昌，以言語恐嚇佢。事件再有新發展！李兆富尋日透過律師入稟高院，控告葉劉誹謗。佢指今次入稟係為咗尋求公義，坦言「係為咗啖氣！」葉劉則指警方已正式立案及進行刑事調查，又話「點解要向佢道歉啫，我點解要收番，我講嘅係真話嚟嘅」。
李兆富回覆查詢時話葉劉第一日公開指控佢嘅時候，佢已表明若當中有任何誤會，願向葉劉作解釋，惟葉劉堅稱冇誤會，故認為葉劉有需要為自己該番言論負責。佢隨後尋求法律意見，律師認為可以處理事件，遂委託律師入稟提控。問及有冇要求賠償或道歉，佢就話冇特別要求，重申自己係為咗尋求公義。
指事情性質同感受係關鍵
葉劉回應事件時就話已將佢同袁彌昌嘅錄音交給警方，認為字眼唔係問題，關鍵係事情嘅性質同佢嘅感受，又指「點解要向佢道歉啫，我點解要收番，我講嘅係真話嚟嘅」。佢強調完全唔擔心李兆富採取嘅法律行動，唔認為自己有誹謗，所講嘅全部係真話，若李採取法律行動，佢亦可採取法律行動辯護。被問到會唔會考慮控告李兆富，佢就話會先諮詢法律意見。
葉劉估計李兆富對佢反擊係為咗保護自己。被問到李兆富嘅行動係咪為咗嚇佢，佢就話唔想推測，自己有責任為市民發聲，亦要捍衞言論自由。