政情：高永文餐餐「潮」菜 陳凱欣食到怕
食物及衞生局前局長高永文同前政治助理陳凱欣合作無間，即使雙雙離開熱廚房後，仍然見到佢哋孖住出席活動。高永文向來都熱衷潮州文化，同佢合作多時嘅陳凱欣就透露，高永文經常食潮州菜，搞到佢想食吓其他菜式都唔得添！
陳凱欣話高永文同唔少立法會議員係同鄉，好似陳恒鑌、姚思榮同柯創盛等，所以以往高永文相約議員用膳就一定去食潮州菜。但有時食得太頻密，都想食吓其他菜式調劑吓o架，似乎陳凱欣就無咁嘅機會喇。
身為潮州媳婦識煮傳統菜
不過，陳凱欣並唔係抗拒潮州菜，事關佢係潮州媳婦，可以享用自家製嘅特色餸菜，而佢早已學識煮海馬友等傳統菜式，所以佢唔使高永文過招都已經應付得到喎。
另外，當日見到高永文不時矯正其他人嘅潮州話發音，識講少少嘅陳凱欣就話從來無試過，因為高永文知佢唔係潮州人，所以要求無咁高喎。