政情：新常秘持物業大減樓價高嚇怕？

上屆已經出任常秘嘅公務員，唔少都擁有大量物業，例如民政事務局常秘馮程淑儀，申報自己與家人合共持有七個物業，為現有十九名常秘中最多。財經事務及庫務局常秘黃灝玄就申報喺本港及國外有五個物業，商務及經濟發展局常秘容偉雄同運輸及房屋局常秘應耀康各申報了四個物業，其中容偉雄嘅物業包括兩個車位。另一名運房局常秘黎以德同保安局常秘黎陳芷娟各申報咗六個物業同車位，由於兩人係夫婦，即平均而言每人有三個物業。

鄧以海冇儲磚頭 真係清官

至於四名新常秘都只係擁有一至兩個物業，其中有三人都鍾情港島區。發展局常秘甯漢豪同伴侶共同擁有一個港島區住宅連一個車位作自用，至於教育局常秘楊何蓓茵同樣喺港島區擁有一個住宅同一個車位作自用，而商務及經濟發展局常秘利敏貞就有一個港島區住宅作出租用途。

至於從候任特首辦順利過渡成為現任特首辦常秘嘅丁葉燕薇就同伴侶共同擁有一個九龍區住宅作自用，亦喺倫敦持有一個住宅作出租用途。四名新常秘嘅物業都係一間起兩間止，唔通佢哋都受樓價高影響，而無法入市入多幾間？

另外，中央任命嘅部門首長，亦同常秘一樣須申報同公開擁有嘅物業，海關關長鄧以海就係無殼蝸牛，冇持有物業，咁兩袖清風，免卻好多衝突，真係清官呀！