中環出更：謝偉銓爆政府寫字樓環境差
公務員一向有「鐵飯碗」之稱，但立法會前議員、「思籌知路」召集人謝偉銓就踢爆，有政府部門寫字樓環境惡劣，未知會唔會降低市民投考公務員嘅意欲呢？
文件堆上天花 則師要趴地工作
根據片段所見，所指嘅政府測量、規劃、建築專業同事所工作嘅寫字樓應屬於屋宇署。而寫字樓入面嘅行人通道兩旁堆滿文件，而文件甚至堆積到就快頂到天花，都咪話唔誇張。另外，天花嘅電線不止外露，更加係向下垂，如果唔小心纏住電線就真係危險喇！而片段中更出現有外來嘅則師需要趴喺地進行改圖，仲強調屬真人真事添！
謝偉銓曾到有關寫字樓參觀，直言難以想像寫字樓環境咁差，又認為土地房屋係最難解決嘅問題，亦係政府重中之重嘅政策，質問政府點解唔對相關部門增撥資源。佢更重申，政府增加資源，唔單止可以幫助業界，亦都可以加快建屋審批同提升樓宇供應。睇嚟一舉多得喎！