中環出更：立會宴前議員 發叔 黃宜弘 酒仙相聚
立法會尋日舉行與前任議員午宴，多名久未於立法會露面嘅前任議員難得都有應邀出席，包括方黃吉雯、林貝聿嘉、霍震霆、劉慧卿同張文光等，當中為人矚目嘅係兩大酒仙相聚，包括前商界議員黃宜弘（IQ博士）同前立法局主席黃宏發（發叔）。IQ博士話自己依家已經飲少咗茅台啦，而發叔喺宴會中雖然手持酒杯，但似乎都飲酒唔多，佢仲畀其學生兼現任議員林卓廷大爆發叔以前教書，試過逾百人走堂添！
IQ博士話依然最愛茅台，但已經唔「劈酒」，只會歎酒。聽落真係飲少好多喎！佢又話，今年已經八十歲，年紀已經大嘞，食好少嘢，食到唔餓就得，比較健康，又話依家一年喺香港唔超過六個月，成日周圍去旅行，打算今個月二十日凌晨出發睇北極光，預咗好凍，但就唔使特別帶好多羽絨，因為當地都會有提供，加上太太都會為佢準備好。
發叔被爆教書逾百人走堂
尋日撞正發叔七十四歲生日，林卓廷趁機同發叔自拍，仲大爆發叔以前教書經常走堂，走到學生唔上堂添！佢話當年發叔不時會搵司機貼張紙，寫住「發叔有要事，下次補堂」，但從未試過補堂，學生本來就會走堂，加上發叔又會突然唔上堂，惡性循環下，學生走堂更嚴重，試過有堂原本有一百二十人上，結果只係得佢同發叔兩個人上堂，發叔就同佢去咗食飯。不過，林卓廷又話雖然發叔成日走堂，但係講明會盡量畀高分，而且佢相當闊佬，會包晒系會活動嘅酒水o架！
立法會主席梁君彥喺開席前致詞時話，好開心唔少前任議員出席午宴與現任議員交流。但前議員林大輝大呻今次出席嘅現任議員相當少，「點樣現任議員同前議員交流呢？交咩流呢？」覺得發揮唔到交流嘅作用，意義唔大喎。
卓妮