政情：為女揀小學 峯鴿首重「起底」
育有一仔一女嘅立法會議員許智峯（峯鴿）已投入咗幫仔女揀學校嘅行列，佢個大女將要升讀小一，峯鴿話幫囡囡揀學校要先睇學校背景，因為佢擔心個女會被學校「洗腦」喎。如果真係咁驚青，佢每晚幫對仔女實行「再洗腦」咪得囉！
峯鴿話因為自己係基督徒，所以首選都想幫仔女揀基督教背景嘅學校，感覺品德教育會好啲，另外都要留意學校政治背景，因為有啲學校有建制派背景，佢都唔想對仔女被「洗腦」。
唔好以為揀學校只睇學校背景呀，佢仲希望可以幫個女揀間男女校。唔通佢咁快擔心囡囡識唔到男仔？非也，佢只係想大女順利入讀小學後，將來可以有利細仔入埋同一間小學，方便接送啫！不過，佢就呻依家住緊嘅中西區，唔少有名小學都係女校，所以都好頭痕。為人父母唔簡單，峯鴿睇怕都要戙高床板幫個女慢慢揀學校喇！