政情：爭立會議席泛民初選互廝殺 馮檢基 范國威被圍攻

參選年齡 阿基搞唔清

論壇分兩節進行，九西環節大部分問題針對阿基，包括民協成立時提倡又傾又砌，近年就無傾無砌，阿基強調回歸後已無提「又傾又砌」，仲話喺一三年做泛民飯盒會召集人時已公開認民協已放低「又傾又砌」，幾時應該砌或傾就由各黨自行衡量。對於畀人話上次立法會選舉離棄九龍西選民轉戰新界西，佢堅稱民協無離開過九西，去新界西係因為嗰度有服務，「點解咁亂呢？因為無初選吖嘛！」話當初想搞初選無人肯同意。

至於有指阿基係「永續參選」，令該黨何啟明未能出戰，阿基就話何係佢競選團隊嘅積極分子；喺現場嘅何則表現尷尬，面紅笑而不語。阿基又話初選有機制，黨又有機制，佢就係喺機制下勝出嘅出選代表，仲反問民主動力「你會唔會話今次初選只限十八歲先准參選呢？」不過，按法例規定，年滿二十一歲先可以參選立法會。

新民主同盟嘅立法會前議員范國威喺新界東嘅初選論壇上亦被圍攻，由於范係民主黨前成員，佢先被學者質疑民主派對佢有保留、甚至唔信任，范則指自己「同民主黨講過我哋係冇私怨」，又指自己已將政治紛爭「放埋一邊」。

喺答問環節中，范指自己喺出任立法會議員時，發言次數排行第八，比工黨議員仲要高，郭永健隨即反駁，指范過去只質詢過勞工及福利事務局一次，而該黨嘅議員則逾三十次。後來范指郭自稱「有活力」，而喺議會內需要活力來抗爭，隨即建議二人比併吓做掌上壓，反被郭揶揄「高又高過你、橫又橫過你」。

范遭質疑領導能力差

學聯前常委張秀賢亦指舊年立法會選舉中，新同盟曾發生有數名成員「倒戈」為另一候選人助選，並質疑范嘅領導能力，又批評范「連黨都團結唔到，點樣團結民主派」。范則解釋與領導能力無關，而係相關人士嘅政治選擇同忠誠度問題，又指政黨不時有人進出，認為唔能夠喺初選中放大事件。