中環出更：黎棟國唔愛酒 自爆「咪吓」扮飲
保安局前局長黎棟國自從離開政府熱廚房之後，鮮有出席公開活動，佢早前出席由「盡訴心中情基金」為基督教聯合醫院擴建工程舉辦嘅籌款活動，講起餐桌上嗰杯酒，佢就自爆根本唔鍾意飲酒，平日出席宴會多數都只係「咪吓咪吓」扮飲酒，所以一定唔會酒駕。
澳洲自駕遊過揸車癮
黎棟國話自己好鍾意揸車，以前做局長時，亦會趁周六、日過下揸車癮，做「Sunday Driver」，不過自己根本唔會揸快車，所以唔會有危險，而佢最近去咗澳洲旅行幾個星期，亦趁機自駕遊，相當開心。
喺政府工作期間，黎棟國話都唔得閒去旅行，所以趁住退休就去咗日本同澳洲，當然有帶埋太太一齊啦，佢話退休後最重要嘅工作就係陪住太太。咁聽落，唔通黎太以往怪過佢太忙唔得閒陪自己？黎棟國即刻大笑，話佢唔會咁講喎。睇佢咁開心，相信太太都一定諒解佢以前工作咁忙嘅。
卓妮