講起基建延誤及超支，香港都可以話係專家咯，不過咪以為香港認咗第二，冇人敢認第一喎，查實隔籬梳打埠都係一擔擔，淨係起間醫院咋，拖足八年仲係爛地一塊，仲衰到涉及利益輸送亂象。港澳兩地「海軍鬥水兵」，水鬥水，邊個醜啲真係好難講。
嗱，乜嘢係真正澳門速度，乜嘢叫廟小妖風大，睇嘢嘞。話說澳門離島醫院○九年開始籌備，一一年拍板興建，原定今年底完成首期項目，點知市民等到頸長，到家陣仲係十畫未有一撇。澳門運輸工務司司長前排被立法會議員狂炳，居然仲好意思藉口多多，話工務部門只係負責工程，因為未收齊圖則所以招唔到標喎，仲話現時具備條件興建嘅只有員工宿舍大樓，「起完都係放喺度」，即係大條道理卸膊啫。
點解連圖則都未收齊？當中梗係有古怪喇。本報調查發現，澳門政府喺冇公開招標之下，將價值二億三千多萬元嘅醫院設計合約直接批畀單一建築設計公司，而呢間公司過去幾乎包攬大小政府工程，因而有「特首御用則師」稱號。咁巴閉咯喎，負責人當然大有來頭喇，原來係澳門行政會委員之一吖。正如立法會議員話齋，將合約批畀自己友，過程黑箱作業，明顯存在利益衝突甚至利益輸送，點解醫院動工無期而澳門政府闊佬懶理，家陣明晒喇。
如果以為上面單畸士已經夠晒離譜，咁就大錯特錯嘞，就講澳門賴以維生嘅博彩業吖，六個賭牌即將於二○至二二年到期，殊不知澳門政府唔嗲唔吊，話就話委託唔同機構就續牌事宜展開研究，實際上遲遲唔披露資料，死拖爛拖。喂，博彩業係大生意，差唔多養活全澳人民，到底有冇得續牌，同埋幾時將賭牌重新公開競投，要公開畀大家知至得吖，乜都收收埋埋，話唔係玩嘢都冇人信咯。
仲有呀，澳門衞生問題一樣令人冇眼睇。呢，澳門巴黎人酒店今年四月咪爆發退伍軍人症嘅，澳門衞生局仲話高度關注添，結果事隔逾半年，酒店供水系統仲係發現退伍軍人桿菌，問你死未。話口未完啫，當地又確診一宗新嘅退伍軍人症個案，唔驚就假。至於澳門海關兩次倒掛五星旗及將六名無辜旅客無理扣查鬧劇，前者輕輕罰款了事，後者至今查冇下文，唔係官官相護係乜吖。
睇到喇，澳門不但唔係一國兩制「光輝典範」，反而係藏污納垢之地，有人話澳門政府管治「衰過清朝」，一啲都冇誇張o架。所以話啫，香港同澳門根本就係難兄難弟，一個反斗，一個愚昧，衰格程度無分彼此嘅咋。