政情：小明推新歌 「Rap」住撐高鐵
「小明」兒科醫生李家仁唱紅「小明」系列歌曲，仲要以Rap歌嘅方式力撐高鐵？李家仁早前獲政府委任新公職，於年初開始出任獨立監察警方處理投訴委員會（監警會）成員，佢喺百忙中都創作名為《小明搭高鐵》嘅新歌，當中歌詞其中一句提到「一地兩檢靈活措施利市民」，原來小明係想帶出高鐵通車後，會有利市民來往內地。
唔明點解要嘈一地兩檢
小明透露，事隔幾年就覺得要推出新歌，又笑言小明同火車、鐵路等都好有緣︰「二○○一年小明坐火車去廣州，自己同火車都有緣分，但發現高鐵就落成，但喺香港有好多爭拗，其實小明好簡單，只係想開心方便，如果有高鐵旅遊係幾咁好，咁多人嘈一地兩檢，我都不明白。」
小明之後憑歌寄意表達對高鐵嘅感情，自言雖然新歌嘅歌詞難記，但都即席Rap一段畀在場傳媒聽，小明隨後補充，「live唱真係不簡單，一定會記錯詞」。