政情：Fb密密更新 謝偉銓平反木獨形象
立法會前議員謝偉銓（Tony）近期Facebook更新頻密，而且亦嘗試咗唔少年輕人玩意，好似日本大熱嘅透明奶茶，同佢以往專業形象有所分別。Tony就為自己平反，話唔好以為佢木獨喎，更直言自己好玩得添！
試飲透明奶茶同黑色礦泉水
除咗試飲透明奶茶，Tony又試過飲用來自美國、呈黑色嘅礦泉水，呢啲飲品又真係有別於一般人對飲品嘅認知，連佢都大嘆呢啲產品奇怪。但其實更奇怪嘅應該係佢會將奇怪物品放入口先啱，所以都要大讚佢勇於嘗試嘞！
Tony仲話利用互聯網唔能夠咁悶，更透露Fb內容需要多元化。佢又透露，自己連電競都玩過，而且早喺香港舉行電競音樂節已有所接觸，果然走得夠晒前！不過，佢就話一定冇年輕人玩得咁勁，但平日有時間就會玩吓手機小遊戲，因為有時壓力大都需要渠道去疏導嘅。