中環出更：蘇偉文署任局長 被批人肉錄音機

蘇偉文由今個星期一起署任局長，今次更係佢兩星期內二度署任。喺尋日嘅立法會大會上，佢要回覆兩條口頭質詢，其中回應租置屋邨無障礙設施嘅口頭質詢時，就惹來泛民同建制派議員同聲批評，令到現時緊張嘅議會中，出現短暫嘅團結。

屬於建制派議員嘅柯創盛直指非常不滿蘇偉文嘅答案，批評佢嘅說法不斷重複講稿嘅內容，形容佢重複又重複，好似人肉錄音機；而另一名議員陳恒鑌亦直言對蘇偉文嘅答案非常、非常失望，批評政府對居民嘅不便視而不見，將責任推得一乾二淨。

冇稿唔敢答會否推資助計劃

泛民方面，議員李國麟就指有人問及當局會否推出資助計劃，但蘇偉文就唔敢答，原因係講稿冇而唔敢答，而被問到當局有咩具體方法同數字時，蘇偉文又照搬答過嘅嘢，搞到連代主席李慧琼都出聲，問佢可唔可以直接、具體回答提問，蘇偉文今次真係失威。

卓妮