中環出更：年輕人遇困境 顏吳餘英：唔好避
年輕人不時呻話買樓難、冇晉升機會，部分人更萌生移民念頭。卓妮尋日喺一個活動上見到以玩具業起家嘅中華廠商聯合會名譽會長顏吳餘英，佢話當年同老公面對六七暴動，不單止冇氣餒同離開香港，反而趁市場有空缺走去創業，佢鼓勵年輕人要積極面對困境而唔係諗點去逃避。
顏太話六十年代同老公賺咗人生第一桶金，僅僅一千蚊港紙就膽粗粗諗住搞生意，但咁啱撞正六七暴動。一般人見社會環境不穩，自不然會想離開，但係兩公婆就反其道而行，趁部分商人離開香港，市場出現空缺，更加下定決心創業，結果創出一片天。佢寄語年輕人面對困境唔好逃避，不如轉換思考角度，諗吓點樣利用手上嘅資源去反敗為勝，又指要成功翻盤必須有毅力。
林思俊堅持「慳」家訓
講番個活動，為咗重現昔日碼頭運作嘅情景，潮屬社團總會（總會）會董林思俊同林月萍就換上當年嘅服飾，林思俊仲扮「碼頭咕喱」托米添！林思俊話自己出道時，家族生意已有一定基礎，雖然如此，但家族仍然堅持「慳」嘅家訓，例如唔可以食剩嘢，新年先會買新衫等。不過，佢話新一代好難再跟住做，出外食飯都可以打包剩低嘅返屋企，但買衫就冇可能一年先買一次，但佢話絕對唔會亂買，一定係有需要先會買。
總會主席陳幼南喺主持活動儀式時多次提到「紅船頭」，佢事後解釋話，以前內地唔同省份嘅船隻都會以唔同顏色嘅船頭做識認，而潮汕一帶就係紅色，所以「紅船頭」就係代表潮州人，又話以前啲船要去到東南亞做生意，遇上颱風沉船嘅不計其數，撞到「紅船頭」就可以互相照應嘞！
卓妮