政情：DQ六子未回水 立會轉盈為虧
民主派青年新政游蕙禎、梁頌恆等六人被取消立法會議員資格（DQ），立法會向DQ六子追討議員薪酬及津貼，但六人依家都未找數。立法會行政管理委員會提交咗二○一六至一七年事務報告，根據行管會截至今年三月三十一日為止嘅年度收支結算，發現立法會雖已獲政府增加約一億元嘅財政撥款，但仍然「轉盈為虧」，由一五至一六年度錄得嘅一千二百八十多萬元盈餘，變成近二十五萬元嘅赤字。DQ六子拖欠立法會薪津逾一千三百萬元，睇嚟立法會秘書長陳維安想立法會轉虧為盈嘅話，都要努力向DQ六子追數喇！
議員加人工及換屆 開支大增
根據行管會報告，立法會於一六至一七年、即上一個財政年度，共獲政府撥款八億七千四百多萬元，較一五至一六年度嘅七億七千六百多萬元多近九千八百六十萬元。不過，由於立法會議員薪酬增加，令立法會經常開支增加。而因為立法會去年正值換屆，議員需購買或更換物資，喺非經常開支當中，議員嘅非經常開支償還款額就由一五至一六年嘅七十三萬元，大幅增至逾九百萬元。加上其他非經常開支亦增加咗逾二百萬元，以致總開支接近八億七千七百八十萬元，較一五至一六年度增加一億一千萬元。
除咗議員加薪、立法會換屆令開支大增外，立法會開支增加亦同改善設施及服務有一定關係。立法會除咗將喺大會及委員會會議會為出席嘅少數族裔安排翻譯及傳譯服務恒常化外，亦都為另外兩個會議室增設電子表決系統，一系列措施都令立法會使大咗。雖然立法會已經節省用電，務求慳番啲電費，不過最終都係錄得二十四萬八千元赤字。
六子共欠立會薪津逾千萬元
之不過，DQ六子至今仍未找數，游蕙禎、梁頌恆合共欠立法會一百八十六萬元，同樣被DQ嘅社民連梁國雄、香港眾志羅冠聰、劉小麗、姚松炎亦每人欠立法會二百多萬元至三百多萬元不等，如果陳維安可以成功追番任何一個DQ議員嘅薪津，相信盤數就可以轉虧為盈喇！