中環出更：當選廠商會會長 獲頒榮譽院士 吳宏斌雙喜臨門
香港中華廠商聯合會（廠商會）新一屆會長之爭終於有結果，現任副會長吳宏斌喺無對手之下順利當選，成為廠商會第四十一屆會長，明年元旦正式上任。咁啱尋日下晝投票之前，職業訓練局舉行畢業禮，同時向五位行業翹楚頒授榮譽院士銜，吳宏斌亦係其中之一，可以話係雙喜臨門。
一日之內有兩個咁值得高興嘅事，吳宏斌開心到飛起，喺選舉後嘅慶功宴上話，發夢都冇諗過會成為四大商會之一嘅會長，未來要上下一心，做好廠商會，台下一班手足聽到都拍晒手掌。
李秀恒年底卸任 準備去泉州
廠商會永遠名譽會長楊孫西、施榮懷等人都有出席慶功宴。廠商會今次選舉原本競爭十分激烈，後來另一名角逐會長嘅廠商會原副會長徐炳光突然宣布棄選，先至令選戰嘅緊張氣氛紓緩咗啲。施榮懷話好開心廠商會以後將回復和諧。
吳宏斌就特別感謝以廠商會副會長楊志雄為首嘅競選辦手足，話佢哋功不可沒，包括副會長史立德、家電大佬陳國民、常董吳國安、候任會董黃偉鴻同吳懿容等人。眾人喺晚宴飲得特別盡興，楊志雄形容今次贏得漂亮，功勞係成個團隊喎。
現任會長李秀恒將於今年底卸任，佢已計劃周圍去影相，嚟緊會去福建泉州，事關當地係海上絲綢之路嘅起點。佢又話打算出一本一帶一路沿線主要國家嘅攝影集，現時已影咗三、四十個國家，希望明年可以出版。
卓妮