政情：議會新丁楊哲安 同吳文華交手
自由黨楊哲安（Jeremy）早前勝出中西區區議會山頂選區補選，成功從黨友兼現任財經事務及庫務局副局長陳浩濂手上接棒，力保被視為該黨橋頭堡嘅議席不失，而唔講唔知，Jeremy甫上任中西區區議員，首個「交手」嘅就係立法會前秘書長吳文華（Pauline）！
未有時間向對方請教
Jeremy當選後就立即到中西區區議會開會，期間了解吓工作流程，剛好當日有一個會議係討論英基國際學校喺波老道重建項目，依家係英基學校協會副主席嘅Pauline就出席會議同大家交流意見。
究竟議會新丁同Pauline首次「交手」有冇火花？Jeremy話當日會議議程好緊湊，主要係討論有關項目發展，未有時間向對方請教喎！
Jeremy去完區議會仲即刻落去立法會，同該黨立法會議員邵家輝及建制派「班長」廖長江見面。
對於甫上任就工作繁重，會唔會擔心老婆張新悅詐型？Jeremy大讚老婆當日非常努力咁幫佢拉票，太辛苦嘞，要去做水療抖吓喎。