政情：誓改議事規則 建制齊腳打硬仗

議員棄赴英惹聯想

立法會原定下周三審議建制派同民主派就《議事規則》提出嘅修訂，咁啱下周開始一連多日喺英國倫敦就舉行英國議會模式政府帳目委員會工作坊暨英聯邦政府帳目委員會聯合會座談會。立法會政府帳目委員會原本派兩位成員出席呢個工作坊暨座談會，其中一位係身兼帳委會主席嘅地產及建造界議員石禮謙，另一位就係泛民議員陳淑莊（Tanya）。不過石禮謙早前就通知咗帳委會，話因為健康理由，要缺席呢次工作坊同座談會，變相由Tanya單拖赴英。雖然石禮謙以健康理由唔去英國，但喺修改《議事規則》嘅敏感時刻，難免會引起人聯想。

縱使民主派同建制派都就修改《議事規則》提出多項修訂，但有建制派中人就估計有關修訂會合併辯論，以每名議員發言一次，每次十五分鐘計算，最快約十六小時就可以完成審議。而面對呢場修改《議事規則》嘅硬任務，建制派正、副「班長」廖長江同陳克勤相信都嚴陣以待，建制派只要齊腳，相信民主派亦難再要求點算會議法定人數拉布。

建制派想快刀斬亂麻，但係民主派就想拖延審議。而尋日嘅內務委員會上，兩大陣營已率先就有關修改《議事規則》事宜「駁火」。其中民主派就建議順延多一星期先審議修改《議事規則》，又聲稱應該先審議佢哋早前引用《基本法》第七十三條提出嘅傳召官員嚟立法會回答問題等議案。建制派當然係反對，其中議員郭偉強仲明言修改《議事規則》係用兩、三個月時間，換取未來十年、廿年嘅議會撥亂反正。真係畫公仔畫到出腸。

《議事規則》一戰最快下周三大會上演，喺完成議員口頭質詢同表決上次會議未完成嘅中止待續議案後，就會開始審議修改《議事規則》，屆時建制派如有人稍有不慎甩轆，包括遲到早退、忽然冇影，睇怕都變千古罪人喇。