中環出更：朋友出手做媒人？ 劉慧卿：嘥氣
民主黨前主席劉慧卿（卿姐）喺去年立法會換屆選舉決定唔再連任，結束四分一世紀議員生涯，佢最近接受藝人馬浚偉訪問時，被問及有冇人追求時坦言「十多年都冇乜」；對於有冇朋友做媒人撮合感情，劉慧卿笑稱「嘥氣」，仲反問「你估仲係一百年前咩？」
話一個人住好正
卿姐接受馬浚偉嘅電台節目訪問大談近況，表示自己享受一個人住，形容「真係好到不得了」，「自己住好舒服，返屋企鍾意做乜都得，睇電視唔睇電視，聽音樂唔聽音樂，着衫唔着衫，全部好自由自在。」佢又話，有女性朋友即使拍拖，都選擇唔同別人同住，因為發現自己住係「咁正」，唔會輕易放棄。
感情生活方面，單身逾十年嘅卿姐形容「好適應」，被問及有冇人追求時自言「依家冇乜」，其後再被追問時更話「十多年都冇乜」，卿姐強調自己不分年紀，包括後生或較為年長，「從來乜人約都傾」。對於有否朋友做媒人撮合感情，卿姐表示相信識佢嘅親戚朋友都知嘥氣，並反問「你估仲係一百年前咩？」馬浚偉隨即緊接話，現年六十五歲嘅卿姐仍然後生，卿姐即時回應說「我唔係講年齡，係講媒人。」
卓妮