中環出更:楊立門夾鄭重科 比賽齊打天才波

香港中華廠商聯合會(廠商會)主辦嘅工商體育邀請賽早前落幕,即晚舉行頒獎禮暨晚宴,廠商會會長李秀恒、行政總裁楊立門、立法會體文界議員馬逢國同眾多商會代表都有出席。平時着得官仔骨骨嘅楊立門着住牛仔褲現身,打扮難得咁輕鬆,唔知佢當日係咪落場鬥一番?楊立門笑稱佢確實拍住廠商會印刷業委員會主席鄭重科打羽毛球,但遇上香港會計師公會嘅打羽毛球高手,結果第一輪已經出咗局,諗起覺得又瘀又好笑,仲形容對方「殺雞焉用牛刀」喎。

鄭重科就話對手其實係羽毛球教練,所以佢冇輸得咁慘,攞到幾分已算唔錯。咁賽前同楊立門有冇夾過練波?鄭重科笑稱「心靈上有練過」,其實係打天才波喎!楊立門就話自己運動一向唔叻,今次志在參與啫!

今年賽事共有廿幾個工商團體合共三百八十人參加,係歷屆之冠。卓妮見香港菁英會委員潘偉業嘅哥哥、港九塑膠製造商聯合會副主席潘偉駿不停上台領獎,成個大贏家咁款,原來佢係代表菁英會領取七人足球隊冠軍,又代表港九塑膠製造商聯合會領取女子羽毛球冠軍等獎項。

潘偉駿話贏波靠拚搏

潘偉駿話,自己同細佬都有代表菁英會踢波,講起賽事仍然好雀躍,事關戰況十分激烈,佢哋原本輸波,但於完場前,潘偉業入咗關鍵一球同對手打和,最終於互射十二碼階段擊敗對手。贏得咁驚險,難怪潘偉駿咁肉緊,仲形容贏波關鍵係憑住打不死嘅拚搏精神喇!

卓妮

第一手消息請下載on.cc東網iPhone/iPad/Android/Windows Phone Apps