政情：廠商會選會董 戴澤良意外被Out
因為會長之爭而備受矚目嘅中華廠商聯合會（廠商會）新一屆會董當選名單尋日揭盅，有意角逐會長嘅現任副會長吳宏斌陣營獲得大勝，先前贏得候選會董嘅二十六人名單全數當選。至於八十八名尋求連任嘅現任會董之中，有四人落選，當中以副會長兼展覽服務公司主席戴澤良被篩走最令人意外。
太太亦落選
經過一輪奔波攞票後，廠商會尋日開票選出一百一十名會董，落選嘅舊會董除咗戴澤良之外，仲有佢太太羅台秦、余德明同符策雄。另外，早前棄選新一屆會長嘅副會長徐炳光，同時亦退出會董競選。
據悉戴澤良排名第一百一十一位，係候補會董第一名，雖然只係差一個名次就可以躋身會董會，但聽講佢只係攞到六百幾票，比排名第一百一十名嘅會董攞到一千二百幾票，票數差距接近一倍。
至於當選會董有唔少新面孔，包括香港青年工業家前會長張傑、珠寶界靚女王淑筠等人。
新一屆會董名單出爐之後，下一場仗就係會長選舉，將喺十二月五日舉行。