港產官僚成日畀人鬧四方木，踢一踢郁一郁，唔死人冧樓都唔做嘢，估唔到家陣衰到連踢都踢唔郁，真係冇法子唔寫個「服」字畀佢哋！
本報揭發鴨脷洲海旁道附近船廠泊位被人擅自更改用途，將維修船隻停泊使用嘅船排租出作遊艇泊位之用，擺明違反短期租約嘅相關規定，估計每年穩袋過千萬元。有人將官地當私人提款機，當局扮盲當睇唔到已經夠離譜，最過分嘅係，官老爺補鑊都補得求其過人。記者尋日去現場睇過，發現「違泊」問題依舊，海事處係就係派出船隻巡邏，但轉個頭就鳴金收兵，冇採取任何行動，完全係做騷咁做。
即係咁，泊位被霸佔兼夾牟取暴利，地政總署第一個要孭鑊，功夫茶尋日已經率先鬧爆，主管該部門嘅發展局局長黃偉綸事後又係輕描淡寫，大耍官腔，話該署會視乎情況採取行動，情況嚴重會考慮取消租約。嗱，你係至好講吖，本報報道已經踢爆晒有關人士點樣鑽空子逃避租約規定，家陣就睇吓你哋點樣亡羊補牢，堵塞漏洞嘞。
如果話發展局都仲叫做肯出嚟做吓樣敷衍吓市民，海事處頂頭上司、運房局局長陳帆直頭連影都冇，卸膊卸成咁，簡直令人嘆為觀止。你知喇，港產官僚一向奉行多做多錯，少做少錯，唔做唔錯嘅哲學，老頂都未出聲，梗係懶得就懶，關人個關喇。
不過大家都見怪不怪咯。幾年前造成死傷枕藉嘅南丫大海難，揭露海事處喺審批圖則、監督建造、驗船以至執法等各個環節一條龍犯錯。之但係天怒人怨又如何？「刑不上大夫」，最終又係是但搵個助理處長祭旗就算，處長固然安全着陸咬長糧，對上嘅司局長更加毫髮無損，犯錯成本超低咯喎，唔出事至奇喇！
俗語有云︰花花轎子人抬人，官官相護嘅黑幕，市民仲見得少咩。鉛水風波搞到千家萬戶雞毛鴨血，水務署、房署等官員明顯失職，林鄭「官到無求膽自大」，一句「制度缺失」推得乾乾淨淨，手下全部好官我自為之，又點會痛定思痛吸取教訓，結果咪搞到食水安全危機不斷，鉛水剛過怪水又來囉。又好似耗資十五億元嘅爛鬼空管系統，甩漏接二連三，死機仲多過食飯，空中驚魂不斷，遲早出大事嘅咋。至於康文署、食環署等衙門，全部都係醜聞一籮籮，睇吓審計報告就知咩料。
都係古人講得啱：「國家之敗，由官邪也。」成個官場上樑不正下樑歪，冇規冇矩，一個二個得過且過，胡混度日，香港真係多得佢哋唔少！