政情：想搞打天九大賽 侯志強稱非鼓吹賭博

擔心失傳 趁機推廣

侯志強話自己約六歲就識打天九，但近年就愈嚟愈少人識打天九，所以打算喺農曆新年後，搞一個打天九大賽，因為過年就最多人玩，承接個熱潮，初步構思嘅比賽方式，就係先由廿七鄉篩選代表隊伍，全港市民都可以參加，其後由廿七隊逐步篩選出十二隊、四隊、兩隊，最後一隊勝出，就可以成為「天九王」嘞！

講講吓，佢仲開始教大家點樣打天九，講得相當起勁。佢仲話依家開始教六歲嘅孫仔打天九，先傳子，再傳女，又大讚天九可以訓練到腦筋靈活啲喎，佢擔心過多幾年會失傳，所以依家要推廣多啲喎。