政情：去旅行跟團冇人識 何俊賢自嘲知名度低
旅行團經常被嘲為鴨仔團，因為要趕景點，而且行程一早規劃好，自由度較低，所以近年愈嚟愈多人鍾意自由行。不過，立法會議員何俊賢（高佬賢）就自爆，擔任議員後仍有跟團去旅行，而團友仲要去到旅程尾聲先知道佢係議員添！
高佬賢透露，喺第二年出任立法會議員時，就曾經參加過五日四夜團，當時團友更多達三十人添。不過，玩咗幾日團友先發現佢嘅職業，難怪佢自嘲當年知名度低喇！不過，佢今年已經係第六年做議員，相信唔會再發生呢件事。
張國鈞兩千金撩空姐傾偈
身兼行政會議成員嘅議員張國鈞就話自由行最擔心語言不通，不過好彩互聯網資料豐富，只要做足功課就唔使怕，難怪佢唔使參加旅行團都無問題喇。佢又講起首次帶大女搭飛機時，雖然一早同佢做定心理準備，但飛機一駛離停泊處，大女就驚到要除安全帶爆喊，更大叫要去外婆屋企添，唔怪得佢話要由短線旅行慢慢訓練。不過，依家兩個女已經適應咗，搭飛機時仲會自動撩空姐傾偈添！