政情：東華補選建制輸議席葉國謙又孭鑊

東華選區嘅議席空缺源於蕭嘉怡辭職加入政府任政務司司長政治助理，白鴿黨過去十年均有派人喺東華選區參選，當中有贏有輸，今次派出第三度轉區參與區選嘅伍凱欣；至於蕭嘉怡所屬嘅民記今次決定唔派人出戰，避免被選民以選票懲罰蕭嘅接班人，最終由呂錦強披甲上陣，值得留意嘅係，呂喺競選期間多次獲建制派重量級人士站台支持，包括食物及衞生局前局長高永文等人，因此呂被視為與建制派友好。

民記疑放軟手腳 籌備下屆

有政界中人選前評估東華選區，建制、民主派勝出機會係五五波，最終結果勝負只喺百幾票之間，當中伍凱欣保住民主派基本盤，取得一千零三十四票，相反呂只得九百零九票，與蕭嘉怡前年得票相差四百多票。有政圈陰謀論指，低投票率嘅傳統智慧，應對屬於建制派政治板塊嘅候選人有利，然而，今次呂錦強完全無受惠於不足四成嘅投票率，未能「悶聲發大財」，有傳呢個同民記放軟手腳，未有將鐵票全數過戶畀呂錦強有關，有人更估計隨着呂落敗，民記將大條道理喺兩年後嘅區選，派出自己人去收復東華選區嘅失地。

另有政界中人分析，呂錦強一反喺選前獲建制派重量級人士群星拱照嘅情況，選舉當日只有自己同助選團拉票，最終不但與建制派「切割」不成，更因缺乏叫座力，未能吸取游離票支持，最後選情亦回天乏術，只能與議席擦身而過。

暗鬥輸一着 許智峯勢孤弱

同樣值得留意嘅係，雖然白鴿黨今次成功重奪東華選區，但外號「峯鴿」嘅立法會議員許智峯或斯人獨憔悴，事關佢當初屬意嘅參選人無緣出線參選，依家畀由南區「乳鴿」支持嘅伍凱欣出選並成功當選，峯鴿面對南區「乳鴿」步步進逼同擴大勢力，預料未來會有更多明爭暗鬥。

此外，同日另一場補選，教育局前政治助理、自由黨楊哲安以近千票之差，大比數擊敗對手當選，力保自由黨喺山頂選區呢個橋頭堡。因應楊哲安首度當選區議員，加上有多年喺官場打滾嘅經驗，據聞有人密謀力推佢更上一層樓，喺兩年後再度連任區議員後，於二○二○年立法會換屆選舉衝擊俗稱「超級區議會」嘅區議會第二功能界別議席，究竟呢個算盤係咪打得響，時間將會證明一切。