中環出更：吳克儉玩自拍 自誇技巧趨純熟
教育局前局長吳克儉正享受退休生活，好少喺公開場合露面。早前就喺一個晚宴上見到佢，見佢精神飽滿咁坐喺主家席上，仲不時玩自拍自娛，睇嚟真係無官一身輕喎。
搵埋隔籬嘉賓一齊影
晚宴通常要等到典禮完畢先上菜，當日見到吳克儉攝影師上身，拎住手機為台上正在進行中嘅典禮影相。除此之外，佢又同坐隔籬嘅嘉賓玩自拍，影完仲要先過目，睇吓影成點，佢仲非常之有效率咁，即時上載到社交網站添！
吳克儉就話出席活動影相再放上社交網站，係一種表示支持嘅行為，而上載嘅相多數同活動有關，佢仲話自己自拍嘅技巧愈嚟愈純熟添！佢又講到同屋企人去旅行時都鍾意影相，但就無追求用乜嘢器材咁話。不過，佢話影相影得多，就可以鍛煉出用影像去講故事，而比較番每年同家人去旅行嘅相，就更加會有特別體會添！睇嚟佢真係對影相好有心得喎。
卓妮