中環出更：談入市經驗名人齊籲咪投機
有人形容「港股大時代」即將重臨，唔識投資都會入市，但好多政商界名人都提醒投資要小心。早前喺珠海社團總會嘅活動上見到菁英會主席莊家彬，佢講起十幾年前試過相信「刀仔鋸大樹」，買窩輪蝕過幾十萬元，依家都會小心投資，亦傾向投資一啲風險較低嘅產品。至於珠海社團總會副秘書長潘偉業亦試過損失幾個月人工，形容係慘痛教訓，以後都學識投資，唔投機嘞！
莊家彬話當年窩輪好似好勁，全港有好多輪王輪后，自己當年就相信「刀仔鋸大樹」，結果就帶來慘痛經歷，所以依家投資都相當保守，一向投資房地產證券多啲，尤其係較穩陣嘅內地公司喺香港發債，息可能會低啲，但係就會穩陣啲，加上自己鍾意睇長線，就比較適合嘞！佢覺得投資最緊要認清自己想買乜嘢行業，未來發展方向點樣先係穩陣，亦要認清間公司係咪龍頭，定只係炒消息。
同稱熟悉股份先好買
身兼中華總商會副會長楊華勇同埋爸爸楊孫西一齊出席，楊華勇話近日都有入市抽新股，睇好創新科技，但佢都提醒市場有升有跌，自己一向唔會投機，所以就唔會有大損失。
潘偉業當日仲帶埋太太嚟，佢哋即將「四年抱三」，唔少人都恭喜佢哋。講起投資，潘偉業話自己啱啱出嚟工作嘅時候，試過喺股票市場損手爛腳，試過買過一隻股票，兩年後市值少於買入價嘅一成，即係等同買一百蚊落去，只剩番少於十蚊，整體損失等同幾個月人工，覺得係慘痛教訓，學識要投資唔好投機，一定要熟悉隻股份先好買呀，佢最近都有抽新股，入咗好多手先中咗一手，認為後市仲有水位，估計到年尾都仲有得升喎。
卓妮