正所謂，一不離二，二不離三。由前特首曾蔭權爵士構思及拍板、大拿拿十五億港元嘅空管系統啟用一年多以嚟，甩轆多過食飯，至弊係民航官僚唔係正視問題，堵塞漏洞，而係一味粉飾太平，企圖大事化小，再咁落去，遲早爆大鑊嘅咋！
呢，最近有傳媒取得新空管系統生產商嘅管理指引，裏面明明建議系統每三十日重啟一次，但民航處由四月至今，實際上額外重啟接近二十次，其中六台工作席更要每周重啟，足足比指引頻密三倍有多；咁都未算，民航處好多時喺繁忙時間額外重啟工作席以及軟件程式，直頭當指引係耳邊風。
空管系統出事，民航官僚例牌輕描淡寫，大派定心丸，話只係「定期維護程序」喎。聽吓航空業界人士點講喇，系統經常要重啟，可能因為工作席運作緩慢以及未能回應指令，反映空管系統可靠性存疑，特別係繁忙時間，更會大大影響空管人員執行職務，隨時釀成巨災。有立法會議員狠批民航處玩語言偽術，粉飾太平，真係一啲都冇講錯。
話民航處係倒米壽星，貼納稅人錢買爛貨，相信冇人會反對。好簡單，如果空管系統真係好似官老爺講到咁先進穩定，美國、歐洲等先進地區一早爭住幫襯，點會零零舍舍得香港、印度同杜拜三個地方用吖。事實係，印度空管人員對系統有彈無讚，工會甚至航空當局發信，警告繼續對系統問題坐視不理，遲早機毀人亡，結果迫使當局下定決心，出年十月轉用新系統。
香港嘅情況亦係差唔多，民航處空管人員最近發生逃亡潮，部分臨近咬糧嘅資深員工都頂唔順劈炮，據講就係因為怕系統一旦出事要孭鑊上身，分分鐘監都有得坐。試諗吓，一個月十幾皮嘢喎，正常嚟計梗係趕都唔走，系統風險有幾高可想而知。至於上述係咪堅料咯喎，功夫茶用例子答你。「走路特工」斯諾登爆完料後，即刻畀美國政府全球通緝；民航處內部人士向媒體爆料，處方隨即大搞白色恐怖捉內鬼，咁你話堅定流吖？
事實勝於雄辯，系統啟用短短一年鬆啲之嘛，航機飛行間距不足事故創下六年新高，至於其他如疊影、鬼影、死機等問題，更加多到十隻手指都數唔晒，請問民航處又點解釋？
咁點解空管系統千瘡百孔，甩皮甩骨，民航官僚仲要死雞撐飯蓋呢？一來啲錢係阿公嘅，莫講話十五億，百五億都視如浮雲；二來認衰從來唔係港產官僚嘅文化，而為咗證明自己「慧眼識筍貨」，民航官員甚至不惜化身承辦商代言人，力撐系統「達國際標準」。不過咪話功夫茶唔警告，航空安全人命關天，有咩冬瓜豆腐，官老爺人頭落地都不足以謝天下吖！