政情：廣場事宜委員會 一舊雲偷雞做主席
立法會行政管理委員會轄下嘅立法會廣場使用事宜委員會尋日舉行首次會議，並選出議員黃碧雲（一舊雲）為主席，取代上個立法年度嘅主席謝偉俊（Paul），唔通畀一舊雲偷雞做到主席？
謝偉俊忘記爭取連任
其實呢個委員會主席一職，喺上一屆立法會從來無變過，四年來一直都係由時任議員劉慧卿擔任。今屆立法會第一個立法年度由建制派奪走主席之位，不過踏入第二年就由Paul變成一舊雲。
該委員會成員只有四名，泛民同建制各有兩名。據聞尋日會議只有一舊雲爭取做主席，Paul連會都無開，唔知係咪因為佢出任議事規則委員會主席，太忙無暇兼顧有關？Paul接受查詢時，竟然反問上個立法年度主席係邊個，聲稱係唔記得要爭取連任，同佢忙唔忙冇關係喎。佢仲話，印象中呢個委員會無乜嘢做，而尋日會議亦因有其他事務在身而無出席會議，睇嚟一舊雲係冷手執到個熱煎堆喎！