政情:行路左搖右擺 莊成鑫睇勻中西專科

中華出入口商會榮譽會長莊成鑫早排被朋友發現佢行路行到左搖右擺,以為佢飲醉酒,但係佢唔止冇飲酒,亦唔覺自己行路有問題,要朋友拍埋片畀佢睇先至信。於是莊成鑫就開始睇醫生搵原因,佢話中西專科都睇過晒,笑言爭在未睇精神科喎!

維他命B12不足

有醫生話莊成鑫嚴重缺乏維他命B12,提醒佢要食番多啲含高B12嘅食物如內臟,不過因為怕膽固醇超標,佢早已戒食內臟,惟有食番,點知情況冇好轉,仲不時會手腳麻痹添!有次佢因為血糖高睇醫生,醫生獲悉佢維他命B12過低,就幫佢轉藥兼開咗B12補充劑,冇耐水平終於有回升喇!

原來係血糖藥令佢流失維他命B12,嚴重缺乏嘅話會導致肌肉及神經萎縮,若處理不當最嚴重係令肌肉壞死,甚至需要截肢添。莊成鑫諗番起呢段時間中西專科睇過晒,只差未睇精神科,仲笑稱唔介意做白老鼠,最緊要有得醫。近來佢做咗幾次顱骶骨治療之後,行路唔穩嘅情況明顯好轉,仲行得快啲添。

第一手消息請下載on.cc東網iPhone/iPad/Android/Windows Phone Apps