政情：譚文豪戒甜減肥 倡售賣機禁高糖飲品
政府場地內嘅自動售賣機即將停售塑膠樽裝飲用水。立法會議員譚文豪（Jeremy）尋日出席立法會財務委員會時，自爆戒飲高糖飲品後「條腰都幼咗兩吋」，建議政府既然為咗環保停售塑膠樽裝水，不如為市民嘅健康着想，停售埋高糖紙包及罐裝飲品，只賣列明低糖嘅飲品喎。
以自身成功經歷作例子
Jeremy話，自從出任議員之後經常與團體、市民會面，一坐落茶餐廳就兩杯凍檸茶，結果肥到要拎西裝去畀裁縫放番大，更被冠上「桶豪」花名。三個月前佢停止飲紙包產品同可樂，就算飲凍檸茶都要求走甜，結果體重輕咗六、七磅。最近佢又要再拎啲西裝畀裁縫改番細，連裁縫都問佢︰「你搞乜嘢呀？」
Jeremy用自己減重嘅例子建議政府為市民着想，考慮政府場地嘅自動售賣機只售低糖飲品。不過自動售賣機已經冇水賣，連飲品都只能揀低糖嘅話，唔知市民會唔會因為冇得揀而叫苦連天呢？