政情：沆瀣一氣 劉夢熊選人大 曾蔭權贈提名

劉已表明意向 冇回應幾時參選

新一屆港區人大代表選舉尋日開始展開提名期，下月十九日進行投票，有多名政界中人首日已報名參選，但暫時未見去年因妨礙司法公正罪被判囚十八個月嘅劉夢熊。有政界人士估計，數日前已表明參選意向嘅佢正在收集提名票，報名參選港區人大係遲早嘅問題。

二人均曾囚於赤柱 互相「取暖」

令人意想唔到嘅係，政圈尋日流傳一張由曾蔭權簽名，指明提名劉夢熊參選人大嘅提名票，認真震驚政壇。一來外界無諗過佢哋會走埋一起「取暖」，二來今次兩人堪稱「相逢恨晚」，事關劉夢熊今年初刑滿出獄後曾自爆，曾蔭權轉到赤柱監獄後兩日，自己就刑滿出獄，因此兩人未能喺獄中見面，佢有委託赤柱監獄嘅懲教人員問候曾蔭權。勢估唔到兩人喺獄中緣慳一面，但私底下似乎私交唔錯，仲因為一場港區人大選舉令兩人嘅友好關係曝光，唔知呢啲係咪冥冥之中有主宰呢？

劉夢熊接受查詢時，被問及幾時報名參選人大，聲稱「未有任何打算」；當問及目前取得多少提名，以及曾蔭權係咪其中一名提名人，則對此不置可否。

雖然今次選舉揭示劉夢熊同曾蔭權明目張膽咁「互動」，不過講到尾，要成為港區人大呢個國家最高權力機關嘅一分子，除咗要擁護國家憲法及香港《基本法》，仲要得到政界人士嘅認可，先至有望脫穎而出。對於曾被刑事定罪嘅劉夢熊意圖躋身國家最高權力機關，建制派陣營都心中有數；至於目前仍係戴罪之身嘅曾蔭權雖無參選人大嘅意願，但身為前特首卻無緣進身十九人主席團名單，雖無太大意外但都幾難睇。正所謂「面就人哋畀，架就自己丟」，有刑事定罪紀錄嘅政界中人「互動」招搖，如果係以為「負負可以得正」，就認真係癡人說夢喇！